20191021. A Pobra do Caramiñal albergou o I Ciclo Victoriano García Martí co obxectivo de dar a coñecer a obra e figura deste escritor pobrense entre a cidadanía. As actividades desenvolvéronse en diversos emprazamentos da vila os días 11, 12, 18, 19 e 20 de outubro. O evento finalizou esta fin de semana coas conferencias Victoriano García Martí. Pensador europeísta e sucesor do Rexurdimento, a cargo de Arantxa Fuentes Ríos, doutora europea en Teoría da Literatura e Literatura Comparada; e García Martí e a súa relación co feminismo, da man de Encarna Otero Cepeda, historiadora e escritora. Así mesmo, levouse a escena Don Severo Carballo. Del alma gallega cun elenco artístico composto por Natalia Otero e Carlos Da Silva, escola de baile e pandeireta Caramiñas, Bradomín Teatro, Os Caraveiros, Tanxedoria, Lumieira e Banda de Caamaño.
