O alumnado participante no Obradoiro de Emprego en Hostalaría Boiro III, o cal consta de dúas especialidades (Operacións Básicas de Cociña e Operacións Básicas de Restaurante Bar), comezarán a partir do luns a elaboración de menús como parte do programa de formación. O Departamento de Servizos Sociais promove unha iniciativa coa que, as comidas realizadas diariamente, se reparten entre as familias necesitadas do municipio.
Así, repetirase o procedemento realizado en anteriores edicións do taller: os operarios de Protección Civil recollerán diariamente os menús no viveiro de empresas, lugar onde se desenvolve o obradoiro, para a súa posterior distribución entre as casas das familias inscritas no servizo. Nesta ocasión, o programa arranca o luns, cunha previsión de 15 menús, número que se pode ir ampliando segundo os fogares que o precisen.
As comidas repartiranse de luns a venres, ata o mes de marzo, dentro do calendario lectivo. Ademais, as familias que estean interesadas en participar poden solicitar toda a información no Departamento de Servizos Sociais do Concello de Boiro.