20191001 Este venres, o grupo de teatro máis antigo de Galicia, o grupo Airiños, vai estrear a súa nova produción. E faino poñendo de manifesto dúas cousas principais: que a agrupación atópase en plena forma (malia ter sido posta en marcha en 1933 en Asados) e que malia o relevo xeracional segue a haber talento, entre as novas incorporacións, no que a elección de textos que representar se refire.
Desta volta, o grupo estreará Unha primavera para Aldara, baixo a dirección de Amantia Coello e baseada no texto de Teresa Moure, unha das escritoras galegas máis salientábeis das nosas letras actuais, autora de clásicos actuais da literatura galega como Herba Moura ou Ostrácia (a vida da amante de Lenin, Inessa Armand) por poñer só dous exemplos.
As funcións serán o venres 4 e o sábado 5 de outubro ás 21.00 horas na Sala Arcos Moldes do Auditorio de Rianxo e están organizadas polo Grupo de Teatro Airiños de Asados.
A entrada ten un custo de 3 € e pode adquirirse en venda anticipada na Perruquería Pelos (Asados), Bar Berberecho (Rianxo) e Estanco Xacobiño (Asados). Tamén estarán á venda na billeteira do Auditorio dende unha hora antes do comezo das funcións.
Segundo informan dende Airiños, Unha primavera para Aldara carréxanos á Galicia do século XV, durante a Revolta Irmandiña, á vida dun convento rexido pola abadesa Aldara Eáns, que discorre con tranquilidade até que chega ás súas portas, en primavera, un guerreiro irmandiño ferido, Don Nuno, pedindo acubillo.
A obra obtivo o Premio de Teatro Rafael Dieste 2007, ademais dos premios da Asociación de Escritores en lingua Galega (teatro) 2008 e sete galardóns María Casares pola montaxe de Teatro do Atlántico, entre eles ao Mellor Texto Orixinal 2009.