20191022. A segunda convocatoria do programa Espazos das Familias chega á Pobra do Caramiñal da man da Asociación socio-educativa Antonio Gandoy e do Concello. Dirixida a familias con crianzas con idades comprendidas entre os 0 e os 3 anos, esta actividade desenvolverase ao longo de todo o curso escolar sen ningún tipo de custe para os participantes. As sesións terán lugar os martes, en horario de 11.30 a 13.00 horas, na Casa da Cultura e Xuventude Raquel Fernández Soler, constando dun tempo compartido e outro individualizado de titorías.
A concelleira de Servizos Sociais, Estefanía Ramos, explicou que esta formación “xuntará cada semana a varias familias para compartir experiencias e facer actividades para mellorar a competencia educativa e familiar.”
Pola súa parte, Olaia González, responsable do proxecto na comarca, manifestou que este programa permite “compartir experiencias educativas, aclarar dúbidas con respecto á educación, un tempo compartido coas crianzas, iremos facendo distintas actividades encamiñadas á estimulación das distintas áreas do desenvolvemento dos nenos e nenas.” Ademais, a psicóloga e educadora fixo fincapé na premisa de que “o desenvolvemento é un proceso que dura toda a vida, pero os primeiros anos constitúen un dos períodos máis decisivos no desenvolvemento das persoas.”
Unha das participantes no anterior curso escolar, Miriam Brión, describiu a vivencia como “marabillosa”, destacando o cómodos que se atopan os cativos. Tamén indicou que este programa posibilita aprender diversos recursos para estar cos pequenos.
A primeira edición desta actividade contou coa asistencia de 12 familias, as cales repetirán a experiencia este ano. Non obstante, quedan prazas libre, polo que os interesados poden cubrir a ficha de inscrición nos Servizos Sociais do Concello.
