20191009 A Tenda Baldani de Boiro, en colaboración coa Asociación Cultural Barbantia, organizou este 5 de outubro, na súa sede do 10 da rúa Pablo Iglesias, a presentación dunha das novelas galegas de meirande éxito da tempada: a recente novela do escritor da Serra de Outes, Abel Tomé, A noite do lobo (Editorial Galaxia), Premio Illa Nova de Novela 2019.
A cita, que reuniu un importante número de seareiras e seareiros locais da literatura e outras expresións artísticas que conflúen coa expresión escrita, estivo presente, amais do autor, a editora de Galaxia, Malores Villanueva, o socio de Barbantia, Xesús Laíño e o impulsor de Baldani, Daniel García. A presentación foi un dos actos cos que o establecemento boirense está a celebrar o seu 18 aniversario.
A novela A noite do lobo, un apaixonante cruzamento de influencias no que podemos rastrexar as pegadas de Julio Cortázar, David Lynch ou Mary Shelley, mesturados en doses axeitadas coa propia visión de Abel Tomé, cóntanos a historia do antigo soldado e cazador de lobos Lourenço d’Ourantes, quen goza do seu retiro nas terras frías e libres de Luiçiana e que nunha mañá de inverno recibe o encargo de pescudar a morte do fillo dun aristócrata, que apareceu devorado polo ataque dun animal.
A noite do lobo recibiu recibiu o Premio Illa Nova de Novela 2019. O xurado, composto pola lectora Paz Raña Lama, a escritora Iolanda Zúñiga e a xornalista Ana González Liste, valorou que nesta novela “o autor emprega unha prosa dinámica, contida, en que nada sobra e coa que logra construír imaxes contundentes”.
