20190925 O proxecto Youtubeir@s, dirixido a converter YouTube e outras redes sociais en centros de actividade audiovisual en galego, está a encarar un mes de setembro (a recta final da terceira edición do certame) ateigado de novidades. Por unha banda está o día de peche para inscribirnos nos premios coas nosas achegas (até o 27 de setembro), uns galardóns que este ano repartirán 6.500 nas diferentes categorías. Por outra banda, está a convocatoria (o 3 de outubro en Santiago) do acto Lista de reprodución ao vivo, unha oportunidade para ver e escoitar ás creadoras e creadores que conforman a comunidade youtubeira. Para rematar, esta fin de semana o certame Youtubeir@s foi recoñecido co galardón Mil Primaveras, concedido pola Coordinadora de Traballadores/as de Normalización Lingüística.
Segundo informa a organización do concurso (unha nutrida fronte común de entidades galegas formado polos concellos de Rianxo, A Baña, Ames, Carballo, Cedeira, A Coruña, O Grove, Moaña, Ourense, Ribadeo, Pontevedra, Santiago e Teo, e polas universidades da Coruña, Santiago e Vigo e a Deputación da Coruña), este foi distinguido pola CNTL, en colaboración da Deputación e o Concello de Pontevedra, como o programa máis innovador. A entrega do premio celebrouse no pazo da Cultura da cidade do Lérez. O acto estivo conducido pola regueifeira Lupe Blanco e Luís O Caruncho e nel entregáronse os galardóns aos seis proxectos escollidos.
O galardón Mil Primaveras é unha iniciativa creada e organizada pola Coordinadora de Traballadoras e Traballadores de Normalización Lingüística (CTNL). Nesta primeira convocatoria concorreron un total de 47 proxectos, dos cales se escolleron o Modelo Burela do IES Perdouro (premio ao mellor proxecto estabilizado), Falemos de ti e min do IES de Soutomaior (premio ao mellor proxecto novo), Desafío 48 h do IES María Casares de Oleiros (premio á mellor comunicación e impacto), Youtubeir@s de 13 concellos, as tres universidades galegas e a Deputación da Coruña (premio ao programa máis innovador), Eu presumo de galego do IES de Melide (premio ao mellor proxecto destinado á mocidade) e GCiencia (premio ao mellor proxecto dun ámbito sectorial).
Respecto do recoñecemento a Youtubeir@s, valorouse o emprego que se fai de linguaxes e estratexias comunicativas atractivas para a mocidade e “que favorece que as persoas que transmiten a través de YouTube o fagan en galego e que as que comunican na nosa lingua aposten polo YouTube, alén de prestixiar o emprego desta rede social como ferramenta creativa”. O xurado tamén salientou “a colaboración de diferentes servizos de normalización lingüística de entidades locais e universitarias” e “a evolución e mellora do proxecto nas sucesivas edicións”. Rosario Pérez Magdalena, integrante do xurado, entregou o premio.
Os Premios Mil Primaveras non están dotados economicamente, mais os premiados recibiron un galardón identificativo. Consistiu nunha peza artística inspirada no logo dos premios e feita de barro de Buño acabado en esmaltes cerámicos. As pezas son obra de Nahuel Pérez, titulado superior en técnicas escultóricas pola Escola Mestre Mateo.
O xurado estivo formado por persoal técnico do ámbito da normalización lingüística, da comunicación e da investigación sociolingüística: Daniel Romero Rodríguez, técnico de normalización lingüística do Concello de Fene, Rosario Pérez Magdalena, técnica do Centro de Documentación Sociolingüística de Galicia, Ana Iglesias Álvarez, investigadora e docente na Universidade de Vigo, María Yáñez Anllo, xornalista e directora da revista dixital Vinte, e Anxos Sobriño Pérez, presidenta da CTNL.
