Rianxo e Lousame súmanse á limpeza fluvial simultánea de Móllate polos Ríos

Cartaz de concellos participantes lanzado polo Concello de Ames

20190925 O Concello de Rianxo e os seus colectivos medioambientais atópanse entre as entidades que colaboran na vindeira edición (a número doce) de Móllate polos Ríos, a xeira colectiva de limpeza fluvial coordinada pola Asociación para a Defensa Ecolóxica de Galicia, ADEGA. Tal e como sinalamos os días pasados dende este medio, a actividade rianxeira centrarase no río Te, que o ano pasado foi incluído no labor de limpeza multitudinaria e simultánea. Nela, segundo fai saber a asociación ADEGA no seu balance 2018 (en PDF), tiveron parte activa 10 voluntarias/os, que recolleron uns 25 quilos de residuos. A nova quedada fluvial (na que participan centos de persoas e concellos de toda a nosa xeografía) será este domingo 29 de setembro.

O Proxecto Ríos, do que forma parte Móllate polos Ríos, é un programa de educación e voluntariado ambiental que ten a finalidade de “dar a coñecer o importante papel dos cursos fluviais, amosar as súas problemáticas así como fomentar iniciativas que permitan á cidadanía o mantemento e a mellora dos ríos proporcionando as ferramentas que garantan a súa participación”.

Para máis información sobre as citas programadas (e as que están por programar, posto que é ben posíbel que haxa incorporacións, de Barbanza e do resto da xeografía galega), cómpre visitar a web de Proxecto Ríos.

Amais de Rianxo, tamén participará outro concello da nosa comarca na quedada de limpeza colectiva: o concello de Lousame, da man da Sociedade Histórica Coluna de San Fins. O teléfono de contacto é 622 312 831.

No caso da actividade de Rianxo, o contacto para a marcha medioambiental é o voluntario Quique, co seguinte teléfono de contacto: 981 860 808.