20190904 A xira do programa Malo será!, da Televisión de Galicia, fará este domingo 8 de setembro unha recalada no Auditorio de Rianxo, a partir das 20.00 horas, onde gravará un dos programas da súa terceira tempada contando coa presenza, a xeito de incorporación especial ao elenco habitual de actrices e actores, do humorista coruñés David Perdomo. Serán dúas horas de humor “protagonizadas polos mellores cómicos da escena galega”.
Para quen non o saiba, Malo será! é un espectáculo gravado en falso directo que achega todo o que rodea á televisión aos teatros das cidades e vilas de toda Galicia. En termos máis concretos, trátase “dun feixe de sketches cómicos” con música en directo e “grandes estrelas da nosa comedia”.
As actrices e actores cos que poderá gozar o público será o noso elenco habitual: Marcos Pereiro, Federico Pérez, Lucía Veiga, Cristina Andrade, Oswaldo Digón, Marita Martínez, Evaristo Calvo, Susana Sampedro, e David Perdomo, que, como dixemos ao comezo, únese como convidado especial.
Segundo informa a produtora do programa, Tex45 Producións, as entradas pódense mercar desde 10 euros a través de Ataquilla.com.
