JEALSA impulsará dúas novas fábricas en Brasil

Sinatura do acordo/ Foto:ASCOM/ Governo do Ceará

20190919 A visita dos representantes do Estado de Ceará (Brasil) ás dependencias en Bodión (Boiro) de JEALSA Rianxeira, unha xuntanza institucional e comercial da que falamos polo miúdo en O Barbanza, foi finalmente a formalización oficial dunha colaboración que vai frutificar en proxectos concretos da conserveira galega alén do Atlántico. En termos máis detallados, durante a reunión na sede de JEALSA (na que participaron o gobernador de Ceará, Camilo Santana, e o presidente da empresa boirense, Jesús Manuel Alonso) asinouse un acordo para construír dúas novas fábricas de JEALSA no devandito estado brasileiro, a engadir á firma filial que a conserveira xa ten en marcha naquelas terras: Robinson Crusoe Foods.

A empresa de Boiro investirá nos dous novos proxectos, moi centrados na conserva de atún e de sardiña, uns 22,1 millóns de euros. A previsión é xerar uns 750 postos de traballo directos. Durante a xuntanza, o gobernador de Ceará, expresou o seu convencemento nas consecuencias positivas que van ter os acordos, que, segundo dixo, “traerán máis empregos e desenvolvemento”. JEALSA, pola súa banda, salientou a relevancia dos proxectos porque “incrementarán a capacidade de produción da compañía conserveira para atender os mercados internacionais”.