20190924. O municipio de Boiro será escenario no transcurso desta semana de actividades de carácter cultural para diferentes públicos.
Así, o centro social de Escarabote acollerá o xoves 26, ás 19.00 horas, contacontos para a igualdade a cargo de Marisa Irimia, baixo o título A Pirata Escarlata. Esta actividade, dirixida a cativos con idades comprendidas entre os 4 e 11 anos, pertence ao programa Ler conta moito.
Ademais, Baobab Teatro chega o venres 27, ás 20.00 horas, á Biblioteca municipal de Boiro coa representación teatral Puño Puñete. Trátase dun espectáculo pensado a crianzas de 1 a 7 anos que conta con música en directo, cancións, contos e tradición oral.
Baixo o título Somos iguais, os contacontos da man de Raquel Queizás recalarán na Biblioteca municipal de Boiro o sábado 28, ás 12.00 horas. Dirixida a cativos de 3 a 12 anos, esta cita enmárcase no programa Ler conta moito.
Por outra banda, a partir das 18.00 horas do sábado 28, desenvolverase no campo de San Roque, en Cespón, o III Encontro Tradicional de San Roque, o cal arrancará cun seranciño para proseguir cun serán tradicional e rematando cun concerto de Tanxugueiras. Tamén haberá xogos populares, sorteos, churrasco e sardiñas.