20190905 A editorial rianxeira Axóuxere está a presentar estes días outra importante novidade que incorporar ao seu catálogo, o novo elemento dun amplo programa estival de actividades do que fomos dando conta ao longo destes meses (por exemplo os obradoiros literarios das escritoras da residencia Axóuxere, a súa participación na Feira do Libro de Rianxo ou a presentación-publicación de Na defensa dos animais, de Óscar Horta). Agora, o catálogo do selo vén de incrementarse con Vir a menos. Crítica da razón nihilista, do filósofo ourensán Brais Arribas.
Trátase dunha obra que, partindo dunha relectura do nihilismo clásico, reformúlao, revísao e recupérao dun novo xeito e “conforma unha vía de pensamento que, transitando desde a ontoloxía até a economía, abre camiño para confrontar o exceso da razón hexemónica”. Ou sexa, a teima de enxalzar o desenvolvemento e a importancia do home por enriba de todas as cousas, unha teima que segue a coller novos azos grazas á suba do neoliberalismo e, que de pensalo devagar, non ten carrexado beneficio algún para o conxunto da humanidade e do planeta (están na orixe dos desastres medioambientais nos que estamos mergullados). O libro leva un prólogo de Teresa Moure.
Segundo fai saber a editorial, un dos grandes puntos fortes da obra é o seu particular achegamento ao concepto do nihilismo, “unha das nocións máis controvertidas e tamén máis suxestivas do pensamento contemporáneo”, cuxo atractivo reside en parte na súa ambigüidade e na súa riqueza significativa, que abre a porta á construción de esquemas teóricos e códigos morais que poden chegar a ser radicalmente opostos entre si”, algúns deles dotados de certas connotacións negativas adquiridas ao longo do tempo. A aposta de Brais Arriba pasa por “concibir o nihilismo dun xeito diferente, ancorado nas condicións de existencia presentes e cun potencial crítico se cabe maior có tradicional”.
