O Auditorio Museo Valle-Inclán da vila pobrense acolleu a presentación do ensaio Na defensa dos animais do filósofo e activista Óscar Horta, un dos últimos libros editados pola rianxeira Axóuxere Editora. O acto contou coa presenza do propio autor, do seu editor Roberto Abuín e de Genoveva Hermo, concelleira de Cultura e Medio Ambiente da Pobra do Caramiñal.
Genoveva Hermo amosou a súa satisfacción por ter participado na edición do volume, apoiando a publicación do mesmo. Ademais, indicou que “desde a Pobra, como Concello pero tamén como corporación municipal” estaban “moi concienciados coa cuestión da defensa dos animais” e que desexarían “poder seguir a implementar normativas e alimentar o desenvolvemento de prácticas cidadás que fosen beneficiosas para os animais, así como concienciadoras a nivel social da responsabilidade que como humanos temos ante estes outros que son os animais.”
Pola súa banda, o editor Roberto Abuín agradeceu o apoio recibido e foi o encargado de presentar ao autor, destacando o longo percorrido que ten desenvolto nas áreas de pensamento e reflexión ética, especializado particularmente en cuestión de bioética e ética animal.
Óscar Horta, quen actualmente é profesor de Filosofía Moral na Universidade de Santiago de Compostela e unha figura na cuestión da reflexión ética sobre os animais, expuxo os tópicos que vertebran a súa obra. Entre elas abordou a diferenza existente entre “seres sentintes e seres non sentintes”. Desde a súa perspectiva, “calquera ser que teña capacidades sentinte de sufrir e ter experiencias gozosas debería ser un individuo de obrigada consideración moral a respectar e valorar.” Así mesmo, falou da dificultade para difundir este tipo de ideas, agradecéndolle ao Concello pobrense un convite que si o posibilitou e a súa colaboración na edición do volume.
Ao finalizar o acto, entregóuselle un exemplar de balde a tódolos asistentes, que puido ser asinado polo autor, e ofrecéuselles un ágape por convite da corporación municipal.
