20190927. Os amantes do teatro teñen unha cita o domingo 29 na Pobra do Caramiñal. O teatro Elma acollerá a función O furancho, a cargo de Marián Bañobre e Isabel Risco. Con texto e dirección escénica de Santiago Cortegoso, este espectáculo ofrece un peculiar furancho onde consumir o excedente de viño, sinónimo de humor, gozando dun espazo de comuñón e de complicidade no que o público se empapará de comedia. Ademais, para os que non beben alcohol en exceso, a actividade ofrece o seu propio balneario, nomeado Furancho Vitivinícola Rosalía de Castro, para desfrutar de tratamentos de beleza e saúde baseados en viñoterapia, pois “o corpo humano é unha vide que se expande. Cada célula é unha uva que flúe no interior. Cruzámo-las sementes das variedades máis exquisitas para atopa-la combinación perfecta que che proporcione relax e benestar. Todo iso sen produtos químicos nin sulfitos. Ecolóxico 100%.”
Organizada pola Concellería de Cultura da Pobra do Caramiñal, o evento arrancará ás 20.00 horas e a entrada será de balde.
