20190912 A estación náutica Palmira Scuba en A Pobra do Caramiñal acolleu o 9 de setembro a presentación do proxecto europeo SANA (acrónimo, en esperanto, de Sporto Adaptita Naturo Naŭtika), que ten por finalidade optimizar a oferta de deportes de natureza para colectivos con diversidades funcionais e favorecer o derrube de muros de exclusión. Na presentación da iniciativa, da que dimos conta en O Barbanza, participaron a entidade galega COGAMI (que conta con dous usuarios, Nieves Gayoso e Leopoldo Gato, integrados no proxecto e mellorándoo coas súas experiencias), a directora xeral de Desenvolvemento Pesqueiro, Susana Rodríguez, o coordinador da área de Accesibilidade de COGAMI, Álvaro García, o presidente de Agan+, e o xerente da empresa Palmira Scuba, Manuel Soliño.
SANA ten como socios a representantes de Francia, Galicia e Portugal.
Na cita presentouse o selo de calidade SANA, unha certificación que sirve para identificar as boas prácticas e os axeitados acondicionamentos daquelas instalacións deportivas adaptadas plenamente aos colectivos de persoas con diversidades funcionais ou de calquera outra índole. Asemade, púxose o foco na importancia do proxecto para promover internacionalmente o turismo galego, favorecendo a súa identificación cos sectores máis avanzados do mundo en materia de accesibilidade.
Durante a tarde, na praia de Cabío, practicaron a navegación en kaiaks adaptados e táboas de paddle surf, actividades que estiveron coordinadas pola empresa Alecrín Actividades e Aventura.
Na xuntanza tamén se deron a coñecer os integrantes (media ducia) do equipo SANA Galicia que vai participar no desafío deportivo que comeza o 21 de setembro na Bretaña francesa para participar en actividades náuticas e terrestres adaptadas, ao abeiro do Desafío SANA e durante unha semana enteira (sete días para experimentar o mar sen atrancos á accesibilidade).
