20190925. A Asociación Boirense de Empresarios (ABE) desenvolverá na súa propia sede, durante os dous primeiros xoves do mes de outubro, accións formativas impartidas pola escola de negocios Galicia Business School.
Desde a entidade manifestan que “esta é unha oportunidade única de asistir en Boiro e de maneira gratuíta a dous cursos superiores impartidos polos mellores profesionais do mundo das escolas de negocios.”
Miguel Ángel Souto Fraga será o encargado da primeira das accións formativas, Habilidades dixitais: Digital Selling, que terá lugar o xoves, 3 de outubro, en horario de 09.00 a 14.00 horas e de 16.00 a 19.30 horas. Nesta xornada preténdese dotar, desde unha perspectiva práctica, de competencias dixitais aos asistentes para desenvolver o proceso comercial e a venta apoiándose nas ferramentas que proporcionan os canais dixitais.
Por outra banda, Maite Gómez-Valadés impartirá o curso de Lean Management que se celebrará o xoves, 10 de outubro, en horario de 09.00 a 14.00 horas e de 16.00 a 19.30 horas. O obxectivo é que os participantes coñezan os elementos dunha transformación lean e, a partir dese coñecemento, poidan construír a súa propia metodoloxía para a aplicación da citada técnica á mellora dos procesos e resultados na súa empresa.
Estas accións formativas enmarcase no programa 2018/9 da rede Eusumo da Xunta de Galicia da que a ABE é a única entidade en activo da comarca e a única beneficiaria para a realización de cursos de formación para directivos na presente convocatoria.
Os interesados poden solicitar máis información ou formalizar a súa matrícula a través do enderezo electrónico info@abe.gal, indicando nome, apelidos e empresa. Ademais, existe a posibilidade de anotarse nunha das formacións ou nas dúas, posto que son independentes. As prazas son limitadas e completaranse por orde de reserva.