20190820. Esta semana rematou a reestruturación dalgunhas seccións do Concello de Boiro. O alcalde, José Ramón Romero, deu orde de facer algunhas modificacións tanto no persoal coma nos espazos que estes departamentos ocupan dentro do Consistorio. O rexedor declarou que con estes cambios o que se busca é unha “maior comodidade dos traballadores, para que poidan ter a man todo o preciso para realizar o seu traballo diario.” Así mesmo, engadiu que “estes cambios van supoñer unha mellora nos servizos que se prestan ás veciñas e veciños do municipio.”
Deste xeito, o departamento de Medio Ambiente trasladouse do primeiro andar do Concello a un espazo máis amplo situado na segunda planta. Este cambio na localización vén dado pola incorporación dunha persoa que asumirá as funcións de control e seguridade ambiental no municipio.
Ademais, a Oficina Municipal de Atención ao Consumidor (OMIC), dirixida á defensa e protección dos consumidores, pasa do segundo andar ao primeiro.
