20190808 Os nosos concellos estanlle a declarar a guerra as cabichas na praia. Se os días pasados falamos do importante papel que están a xogar ao abeiro da campaña autonómica de praias libres de fume, esta semana puidemos saber das medidas a tomar polo Concello de Ribeira na praia da Coroso e, tamén, das iniciativas que o Concello da Pobra vai levar a cabo na Lombiña e nos areais lindeiros. Respecto deste último caso, a acción consistirá nunha campaña de sensibilización sobre a importancia de non guindar as cabichas nas praias, depositándoas nos acubillos axeitados.
A campaña desenvolverase a pé de praia, o domingo 11 de agosto pola tarde, nas contornas da Lombiña, da Illa e máis da Corna. Repartiranse de maneira gratuíta cinceiros portátiles para evitar o depósito dos refugallos do tabaco nos areais, uns residuos contaminantes que tardan unha chea de anos en degradarse e que presentan, na súa descomposición, importantes riscos para o medio e para a nosa saúde. De feito, sábese que persiste no tempo en micropartículas logo de descompoñerse e que cada filtro do tabaco pode contaminar entre 8 e 10 litros de auga de mar e até 50 litros se se trata de auga doce.
O Concello lembra que no caso de non estarmos nas praias na tarde do domingo, tamén podemos acudir á Casa Mariñeira ou á Oficia de Medio Ambiente do Concello para solicitar o noso cinceiro portátil.
