20190807. O Concello de Ribeira e Asociación AGADEA uniron as súas forzas para promover unha novidosa iniciativa medioambiental consistente na colocación de tres puntos de recollida de cabichas na praia de Coroso co obxectivo de contribuír ao bo estado deste areal.
A idea xurdiu da Concellería de Medio Ambiente que dirixe a edil Elvira Pereira e que se puido materializar tras recadar o apoio altruísta do Centro de Alzhéimer de Ribeira, cuxos usuarios elaboraron os puntos de recollida cos seus correspondentes caldeiros a modo de actividade terapéutica que favorece aspectos como a súa motricidade.
En total, fixéronse 24 caldeiros para depositar cabichas que se van a distribuír en tres zonas de Coroso. A idea é que os bañistas collan e usen estes elementos -pensados para depositar cabichas, pero tamén pipas e outros refugallos- e unha vez rematen a súa estancia no areal os baleiren nunha papeleira e os deixen no seu emprazamento orixinal para que outras persoas poidan empregalos.
De frutificar a iniciativa, sinalou a edil de Servizos Sociais, Ana Ruiz, estenderase a outros areais do municipio.