20190821 O Club Náutico de Rianxo celebrou o pasado sábado 9 de agosto a súa tradicional cea de socios, en palabras da entidade “unha cita clásica dentro do programa de actividades estivais do club”. A xuntanza, á que asistiu unha nutrida representación de membros do Club Náutico, familiares, amigos e seareiros da navegación deportiva e de lecer, contou coa presenza da conselleira de Mar, Rosa Quintana, o decano da Facultade de Medicina de Santiago de Compostela, Julián Álvarez, o xefe de Servizo de Dermatoloxía do Complexo Hospitalario Universitario de Santiago (CHUS), Hugo Vázquez, o comandante do posto da Garda Civil de Rianxo, Primitivo Aliste, ou o inspector xefe da Policía Local, Antonio Tubío, entre outros persoeiros do tecido público e privado local e galego.
O restaurante Tialena de Rianxo foi o lugar elixido para o tradicional encontro. Ás sobremesas o presidente do club, Elisardo Fernández Villanustre, dirixiuse aos asistentes agradecendo a súa presenza no acto, en especial á conselleira Rosa Quintana e demais autoridades. Tamén tivo palabras para lembrar o importante legado do socio fundador da entidade, Ramón Noya, e máis o de Enrique Abuín Queiruga, profesional do club durante moitos anos, ambos recentemente falecidos.
