20190816. O alcalde de Boiro, José Ramón Romero, está en comunicación coa súa homóloga no Concello de Bétera, Valencia, co obxectivo de traballar no eido da recuperación da memoria histórica. Desde o municipio valenciano puxéronse en contacto co Concello de Boiro para achegar os datos relativos a veciñanza do municipio falecida no campo de concentración de Portaceli, en Serra, e que recibiron sepultura no cemiterio de Bétera.
Foi o Documentalista Municipal de Bétera quen, a raíz duns traballos levados a cabo pola recuperación da memoria histórica do municipio, tivo coñecemento de que entre os anos 1939 e 1941 unha persoa natural de Boiro falecera no citado recinto, sendo posteriormente soterrado no camposanto valenciano, agora municipal, pero que naquel momento era parroquial.
Así, o Concello de Bétera comunicou ao de Boiro sobre o seu achado para enviar toda a información e datos relativos a este veciño do municipio coa intención de informar á súa familia. Pola súa parte, o goberno local atopou aos achegados desta persoa co propósito de facelos coñecedores da información proporcionada. Os parentes sinalaron que non estaban ao corrente deste feito, polo que pediron que se lles remitise toda a documentación da que se dispón.