20190801. Ao igual que na Festa da Dorna, a asociación Mulleres en Acción desenvolve durante as Festas de Verán ribeirenses a campaña Rede Lila, unha iniciativa de acompañamento de mulleres. Segundo o colectivo feminista, o obxectivo é contribuír a uns festexos libres de violencia machista.
A Rede Lila funciona a través de mulleres voluntarias, facilmente identificables porque van provistas dun brazalete ou diadema morada que leva a inscrición ‘PUNTO LILA’. Ademais, non hai localización concreta, xa que as voluntarias estarán en distintos emprazamentos da celebración para que, calquera muller que sufra unha agresión machista ou calquera persoas que a presencie, poda poñerse en contacto con elas e pedir axuda. No caso de non haber ningunha preto, tamén se pode contactar por teléfono, chamando ou enviando unha mensaxe de Whatsapp ao 609351063 .
Desde Mulleres en Acción manifestan que esta iniciativa ten unha posible función disuasoria e “pensamos que esta acción contribúe a crear consciencia acerca da importancia da sororidade para desfrutar das festas en pé de igualdade, sen medo e coa seguridade de que vai haber alguén a quen acudir no caso de sentíreste atacada.”
