Os pobrenses contarán coa apertura da Casa da Mocidade en outono

31 Xullo 2019

20190731. A Pobra do Caramiñal contará este outono coa Casa da Mocidade completamente rematada. Para lograr este obxectivo, estase habilitando a primeira planta do antigo restaurante O Lagar, edificio alugado polo Concello para uso sociocultural e cuxa planta baixa alberga o espazo de coworking dispoñible desde o verán de 2017 cunha capacidade para acoller a dez emprendedores. O alcalde pobrense, Xosé Lois Piñeiro, manifestou que se decantaron por ese lugar porque “decidimos facer a Casa da Mocidade tamén un pouco vinculada ao coworking porque o noso desexo é que alí, algunha vez, teñamos un traballador ou traballadora do Concello que estea atendendo todo o que temos pensado desenvolver nese edificio.”

Desta maneira, o inmoble de 265’40 metros cadrados dividirase en catro áreas principais. A multiusos de 108’80 metros cadrados estará dedicada ao ocio, actos culturais e calquera evento que poda deseñar e pensar a propia xuventude e, incluso, que poidan propoñer desde os distintos departamentos do Concello, principalmente a Concellería de Mocidade, pero tamén pode ser a de Cultura ou calquera outra que decida facer algunha actividade alí para a xente moza. O rexedor expresou que ten que ser “unha sala multiusos que permita a diario un uso recreativo e, cando haxa actividades que necesiten máis espazo, que se poda deixar libre para concertos, obras de teatro ou o que sexa. Que sexa unha sala que nos dea bastante xogo nese sentido. Está pensada para que funcione desa maneira.” Na sala de traballo de 24’55 metros cadrados, que funciona tamén como aula de informática libre con wifi, os usuarios poderán estudar, reunirse, levar os seus propios ordenadores ou facer uso duns cantos que lles prestará o Concello. Esta decisión vén dada porque “nunha reunión que tivemos con mozos e mozas, o que nos dixeron foi que non querían unha sala de informática ao uso porque case todos xa teñen o seu ordenador ou o móbil e que preferían mesas libres para poder traballar.” Na zona de FabLab, de 45’30 metros cadrados, situaranse unha serie de ferramentas e maquinaria relacionada coa fabricación e elaboración de materiais por parte dos usuarios. Así, unha parte será máis tecnolóxica con impresoras 3D e equipos máis modernos; e a outra contará con material típico dun taller. De feito, neste último espazo xa houbo un grupo de rapaces interesados. Na cuarta sala, a cal tamén estaba pensada para o FabLab e de 28’25 metros cadrados, localizaranse algunhas máquinas que resulten molestas acusticamente ou produzan gases, polo que se manterá máis illada, servindo tamén de almacén do propio FabLab ou mobiliario da multiusos cando se precise que estea despexada. Así mesmo contará con aseos de 23’40 metros cadrados, co propósito de facer un deles accesible. Tamén está pendente dotar ao edificio dun ascensor que abrirá directamente ao corredor de entrada de 35’10 metros cadrados da Casa da Mocidade.

A intención do Concello é acabar adquirindo a totalidade do antigo restaurante, co cal disporían a maiores dunha cociña e dun despacho. Segundo manifestou o alcalde, tentarán efectuar a compra antes de que conclúa o ano, polo que a cociña se incorporaría vinculada á formación e á posible aprendizaxe mediante cursos. A pesar de que estaría aberta a outros usos, sería un complemento máis para a xente moza.

Os traballos de tabicado e instalación eléctrica xa están finalizados, polo que só queda a dotación de mobiliario e equipamento. A Concellería de Mocidade, delegada no edil José Andrés Lojo Fernández, será a encargada de administrar este recinto.

O custe total da actuación ascende a 110.580’83 euros, dos cales a Asociación de Desenvolvemento Local Deloa subvenciona o 68’3%, correspondéndose con 75.526 euros.

Outros artigos

Publicidade

Revista en papel

Opinión

“Reto astrolabio”. Alberto Barciela

“Reto astrolabio”. Alberto Barciela

El mar merece respeto, aun así reclama y admite audacias, quizás motivadas por el horizonte casi infinito. El ser humano, en la búsqueda de sí mismo, de completar inquietudes y afanes, de responder a su curiosidad, acepta con gusto el reto de los nuevos rumbos,...