20190701 A Deputación da Coruña pon en marcha hoxe o primeiro dos seus cursos de vela para este verán. O emprazamento da estrea da campaña formativa é o litoral do concello de Boiro. Máis tarde, os eixos do programa irán desprazándose a Outes, Fisterra, Malpica e A Coruña. Os cursos de navegación a vela vanse desenvolver durante os meses de xullo e agosto (até o día 9). En total participarán 240 nenas e nenos das diferentes comarcas onde se vaian desenvolvendo as xeiras marítimas.
Este programa é froito dun acordo asinado entre a entidade provincial e a Federación Galega de Vela. A alianza formalizouse a semana pasada, coa sinatura dun contrato na que participaron o deputado de Contratación, Xesús Soto, e o representante da entidade deportiva, Manuel Villaverde.
Nos cursos, que terán unha duración de cinco días en quendas de mañá (de 10 a 14 horas) e de tarde (de 16 a 20 horas), realizarase unha iniciación aos principais conceptos teóricos e prácticos da navegación a vela, así como un curso básico da elaboración de nós mariños. A incorporación e regreso ás instalacións náuticas onde se desenvolverán os cursos correrá por conta dos participantes.
