Ribeira respira estes días un ambiente de expectación que é coma o calmizo (relativo) antes da treboada. E a treboada chámase Festa da Dorna. Á espera do comezo oficial das actividades, este 18 de xullo, quen queira ver como se vai formando o furacán (galerna de toda a vida ou cicloxénese super-explosiva) festeiro pode velo en múltiples detalles.
Por exemplo nas flores dorneiras que engalanan tendas, chaquetas e automóbiles, no esforsado taller-estaleiro dorneiro (a carpa multiusos da praza de España, onde están acoller forma os vehículos e barcos feitos a machada que participarán nas diferentes competicións) ou nos adobíos que reciben aos clientes nas tendas colaboradoras de Ribeira, tanto nos escaparates coma á beira mesma das portas, a xeito de recibimento de dous sentidos: entrando e mercando nestas tendas estaremos apoiando directamente o comercio local e, indirectamente, o presente e o futuro da Festa da Dorna.
Por certo que quen queira participar no concurso de escaparates dorneiros, pode facelo a través do documento en liña habilitado.
Respecto do programa do día 18, as actividades comezarán sobre as 18.30 no parque García Bayón, a carón da Galeguiña, onde os locais co distintivo de Profesional Dorneiro oficiarán á súa maneira de inauguradores. Logo será a quenda dos decibelios, co concerto de De Vacas ás 21.15 horas no escenario do sol, o percorrido do Facho Dorneiro a partir das 22.35 horas e Seremonia de Inisiasión ás 23.00 horas, na porta do Sol. O programa da primeira xornada complétase coa macroqueimada dorneira ás 23.20 horas e o concerto de Sés ás 23.40 horas, tamén no escenario do Sol.
