Arrancan as Festas de Verán de Ribeira

20190731. Hoxe comezan as Festas de Verán de Ribeira e esta mañá, na avenida do Malecón e na zona portuaria, predominaba o afán por rematar os labores de montaxe das atraccións e postos.

A xornada empezou ás 09.30 horas con 21 bombas de palenque anunciando o comezo do día para, ás 11.00 horas, dar paso ás diana e alboradas percorrendo as rúas a cargo dun grupo de gaitas. Ás 12.00 horas, a Tenda-Galería O Faiado abriu unha exposición colectiva de pintura e escultura de Fernando Rey, Óscar Cabana e Antonio Souto; mentres que os máis pequenos desfrutaban na praza do Concello do espectáculo de maxia ofrecido por Álex Louzao, xa que o mago Xacobe non puido por motivos de saúde.

Xa pola noite, ás 22.00 horas, o balcón do Concello será o escenario onde teña lugar o pregón a cargo do actor Luis Iglesia, coñecido por series coma Matalobos ou Pazo de Familia e habitual na Mostra de Teatro de Ribeira.

E como non podía ser doutro xeito, toca bailar e desfrutar da música. Para que isto suceda, terá lugar a actuación, ás 22.30 horas, da orquestra Kubo na praza de España, celebrándose o segundo pase ás 01.00 horas. Ademais, o Malecón acollerá o concerto tributo a El Último de la Fila por parte de Los Aviones Plateados programado para as 00.00 horas.