20190717. A festividade do Carme do Castelo chega á Pobra do Caramiñal do 19 ao 21 de xullo. A actuación musical de Mekanika o venres 19, ás 23.00 horas, na praza do Emigrante marcará o inicio desta cita.
O sábado 20 desenvolverase un amplo abano de actividades. A xornada empezará, ás 10.00 horas, con pasarrúas e alboradas coa Banda de Música Ateneo Musical da Pobra, Os Caraveiros, Arume e Xiada. Ás 12.00 horas terán lugar os pasabares con Aixola para, ás 13.00 horas, dar paso ao concerto da Banda de Música Ateneo Musical da Pobra nos xardíns de Valle-Inclán. Xa á tardiña, ás 20.00 horas, a música tradicional correrá a cargo da Asociación Cultural de Gaitas Xiada e Pandereteiras Ruadiña na praza Rosalía de Castro e, ás 20.30 horas, na rúa da Feira. Asemade, de 20.00 a 21.00 horas, a música e baile tradicional inundará a praza Victoriano García Martí, xardíns Valle-Inclán e praza Paulino Santos Mieites a cargo da Asociación Cultural Arrancadeira, Escola de Baile e Pandeireta Caramiñas e Agrupación Folclórica Xilbarbeira. Ás 21.00 horas toca achegarse ata a Covecha para desfrutar da sardiñada para despois acudir ao concerto da Banda de Música Ateneo Musical da Pobra no Cantón da Leña, ás 22.00 horas. Para rematar o día, terán lugar dúas actuacións musicais simultáneas xa que, ás 23.00 horas, a Covecha acollerá o V Festival Folk con Faíscas da Pontraga e Os Liantes, mentres que a praza Maior servirá de escenario para a verbena co Grupo Dilema.
A mañá do domingo 21 espertará, ás 10.00 horas, ao son de pasarrúas e alboradas a cargo da Escola de Música de Rianxo, Trécola, Chorimas, Os Caraveiros e Xiada. Ás 12.00 horas haberá pasabares a cargo de Aixola para, ás 13.00 horas, desfrutar do concerto da Escola de Música de Rianxo nos xardíns de Valle-Inclán. Pola tarde, ás 19.00 horas, oficiarase a Misa solemne na Igrexa Parroquial de Santiago da Pobra do Deán na honra da Virxe do Carme, cantada polo coro parroquial Abrente. A continuación, sairá a procesión acompañada da banda da Escola de Música de Rianxo e os grupos Trécola, Os Caraveiros, Xiada, Arrancadeira, Caramiñas e Xilbarbeira ata a zona portuaria para seguir coa procesión marítima a bordo dun catamarán, como ofrenda por tódolos falecidos no mar. Na noite, ás 22.30 horas, a Orquestra Ceniza asumirá o rol de poñer a todo o mundo a bailar na praza Alcalde Segundo Durán.
Ademais, do 12 ao 20 de xullo celébrase a novena, ás 20.00 horas, na Igrexa Parroquial de Santiago da Pobra do Deán.
