A rapazada que queira deporte, formación e lecer nun escenario participativo e no mellor ambiente posíbel, vaino ter no Pazo de Rianxiño, entre os días 3 de xullo e 14 de agosto. Estamos a falar do Campamento Urbano e Deportivo de Rianxo, edición 2019, dirixido a nenas e nenos nados entre os anos 2007 e 2015.
O programa de actividades, organizado polo Concello, vén este ano cun total de 175 prazas e unha cota de inscrición que oscila entre os 45 e os 60 euros (o prazo comezou ás 10.00 horas deste luns 17 de xuño). Este ano ponse en xogo unha novidade relativa ao transporte: haberá servizo de autobús e mailo Plan Madruga, que se vai desenvolver dende as 8.30 ás 10.30 horas. A través do campamento achegaranse obradoiros, multideporte, animación á lectura, teatro e música, amais de saída pola vila de Rianxo, festas e acampada. O horario das actividades será o seguinte: de luns a venres, de 10.30 a 13.30 horas. Para máis información, cómpre visitar a páxina web https://concelloderianxo.gal/campamento2019.
