Os populares da Pobra explican a súa postura de cara a investidura

O PP pobrense encabezado por Manuel Durán obtivo nos comicios municipais do pasado mes de maio 5 escanos con 1.968 votos, a 51 papeletas da lista máis votada que resultou ser a de Nós Pobra. Agora e a cinco días da constitución da nova corporación, a formación afirma que seguen intentando abrir vías de diálogo e negociación co BNG e PSdeG-PSOE co obxectivo de “promover tanto unha alternativa de investidura como para garantir un goberno estable, que permita un futuro mellor para os nosos veciños e o noso municipio” despois dos catro anos de “ineficiente goberno por parte de Nós Pobra.”

Tamén indican que as conversas mantidas cos nacionalistas e socialistas “non deron froitos satisfactorios”, especialmente cos primeiros, aínda que agardan que ata o sábado cheguen a un consenso para propoñer o que consideran unha alternativa.

Así mesmo, deducen que as dúas opcións posibles son que goberne Nós Pobra como lista máis votada ou buscar un goberno alternativo. Por iso, estiman que “é a nosa responsabilidade cambiar estes catro anos de xestión de Nós Pobra, os cales pensamos que non foron todo o eficientes que deberían ser.” Deste xeito, apelan tanto á xenerosidade coma á responsabilidade, así como ás manifestacións destes últimos catro anos sobre o goberno de Nós Pobra, na que “tódolos partidos da oposición coincidimos en que non foron os mellores.”

Finalmente, afirman que a situación establece que “é o BNG o que ten a responsabilidade de decidir a alcaldía e quen vai xestionar o noso concello nos próximos catro anos; se queren permitir que sigan gobernando como ata o de agora ou buscar un cambio”, amosando a súa disposición a consensuar e negociar co resto de formacións políticas esa alternativa de goberno ou de investidura.