20190624 Malia non ser un proba competitiva, sempre hai unha gran curiosidade colectiva por coñecer os nomes das persoas que son quen de cruzar a liña de meta de Os 100 dos International Trekkers: as que foron quen de chegar ao remate da gran camiñada (que xa é bastante, e máis se temos en conta que se trata de percorrer a pé cen quilómetros por terras de Barbanza en só 24 horas) e as que tiveron a capacidade de chegar á cabeza do grupo, coma se dun simple paseo se tratase. A a ultra-andaina de camiñantes máis longa (son 100 quilómetros), máis completa e probabelmente máis famosa de cantas se celebran en Galicia, desenvolveuse esta finde, a cabalo entre o sábado e o domingo. O primeiro en chegar foi Francisco Vilasoa, da Pobra, que fixo o percorrido en 10 horas e 41 minutos, un tempo que supera en máis de unha hora a marca acadada polo gañador da convocatoria 2018.
Logo foron chegando, nesta orde, Fernando Álvarez, Francisco M. Méndez, Raul Iglesias e Arturo Piñeiro. O clima non acompañou: ás condicións propias dun clima que é case de montaña (o da serra de Barbanza) houbo que engadir unha temperatura nocturna moito máis baixa do normal para o que acostuma darse na recta final de xuño, ao que cómpre engadir a presenza dun manto de néboa que acompañou aos camiñantes durante boa parte do percorrido. A maiores, o forte vento reinante obrigou aos ultratrailers a empregárense a fondo para completar o itinerario.
Arredor de cen participantes dos 276 que saíron de Ribeira o sábado pola tarde tiveron que abandonar a proba.
Porén, non todo foron dificultades e atrancos extra. Este ano, para garantir a máxima participación, os organizadores apostaron por principiar en terreo doado, máis ou menos a primeira parte do trazado, deixando a faena (o monte en si mesmo) para a segunda metade da andaina.
A experiencia foi un continuo discorrer montañeiro polos principais espazos naturais e paisaxísticos dos sete concellos: Ribeira, A Pobra, Boiro, Rianxo, Porto do Son, Lousame e Noia. A saída efectuouse ás 16.00 horas dende a praza de España de Ribeira e a chegada o domingo pola tarde, no pavillón deportivo de Coroso de Ribeira.
Os 100 dos International Trekkers é unha proba non competitiva de sendeirismo/ultratrail de 100 quilómetros a realizar nun máximo de 24 horas, organizada polo Club Deportivo International Trekkers Barbanza Sar e pertencente á Copa Galega de Andainas da Federación Galega de Montañismo.