20190626. A Federación de Sanidade de CCOO esíxelle ao Sergas a cobertura das ausencias en atención primaria na área de Santiago-Barbanza, “dado o incremento das necesidades asistenciais nesta época do ano.” Segundo o sindicato, as localidades costeiras e os concellos atravesados polo Camiño de Santiago ven duplicada a súa poboación durante o verán, situación “especialmente notable” en Muros, Noia, Porto do Son, Ribeira, A Pobra do Caramiñal, Boiro, Rianxo, Melide ou Arzúa.
Así mesmo, CCOO-Sanidade pide que “a cobertura se faga, preferentemente, mediante persoal eventual e non a través da fórmula da intersubstitución, xa que hai aspirantes dispoñibles nas listaxes públicas e evítase saturar as axendas do persoal que permanece no centro.”
Desde o sindicato defenden que o criterio é o mesmo que recolle o Acordo sobre determinadas condicións de traballo e retributivas do persoal das unidades e servizos de Atención Primaria, publicado no Diario Oficial de Galicia do 16 de xuño de 2008. O texto “dá preferencia” ao chamamento de aspirantes das listaxes de vinculación temporal; “só en último caso alude á intersubstitución, que en todo caso será voluntaria” e recalcan que “esiximos que se cumpra o acordado.”
Ademais, CCOO-Sanidade critica que “hai anos reforzábanse os equipos de Atención Primaria con médico e enfermeira de desprazados, agora non só non se reforzan, senón que nin sequera cobren os profesionais que van de vacacións.” Finalmente, apuntan que todo isto “deteriora a calidade da asistencia sanitaria, ao diminuír aínda máis o tempo de atención a cada doente e aumentar a penosidade laboral dos equipos de atención primaria, que xa deben lidar a diario con outro problemas, como son a carencia de recursos materiais, cotas de pacientes excesivas e, no caso da enfermaría, un aumento de tarefas e funcións respecto das que antes se facían.”
