Rianxo foi outro dos municipios onde os resultados das eleccións municipais non variaron moito respecto ás do ano 2015. A lista do BNG logrou ser a máis votada mantendo así os 6 concelleiros cos que xa contaba, pero sen acadar a maioría absoluta establecida en 9. De conseguir apoio por parte doutros partidos políticos, Adolfo Muíños Sánchez continuaría como alcalde de Rianxo outra lexislatura, en minoría, sumada ás dúas anteriores.
Ademais, o PP de Germán Allut Vidal obtivo 4 actas, ao igual que o PSdeG-PSOE con María del Carmen Figueira Ares á cabeza, pero con menos votos que os populares, mentres que Rianxo en Común capitaneado por Julián Bustelo Abuín mantivo os 2 edís cos que xa contaba. Ciudadanos irrompeu no panorama político rianxeiro con Sara Resúa Patiño acadando o seu único escano e o Compromiso por Galicia de Mª Xosefa Comojo Sobradelo quedou fóra do consistorio.
