Garantir que os concellos que non conten con sucursais bancarias poidan contar con servizos básicos de banca, ao tempo que se asegura, tamén, a capacitación da veciñanza destas localidades en materia de servizos bancarios dixitais. Nisto consiste a medida presentada este 13 de xuño polo Goberno galego, que inclúe (entre outras cousas) a instalación de caixeiros automáticos nos termos municipais que non dispoñan deles.
No caso dos concellos de Barbanza, hainos con graves carencias en materia de servizos financeiros (por exemplo Lousame) e existen localidades como Corrubedo (Ribeira) nas que, malia contar con preto dun milleiro de residentes (cifra que se dispara no verán), hai case unha década que viron esvaecerse a presenza de Novacaixagalicia (a actual Abanca). Resultado: a poboación ten que desprazarse até a cabeza de concello para todo tipo de trámites.
A medida do Goberno galego foi dada a coñecer polo presidente, Alberto Núñez Feijóo, trala celebración do Consello da Xunta. Segundo fixo saber, a licitación (que se fará efectiva en datas vindeiras) é unha resposta “a un problema que se está a detectar nas zonas do rural”. A previsión, de primeiras, é beneficiar un total de 41 concellos que actualmente carecen dunha entidade de crédito, 25 na provincia de Ourense, 10 na Coruña, 4 en Lugo e 2 en Pontevedra. O presidente explicou que este contrato dará acubillo a outros dous servizos, un de asistencia financeira ao cidadán para solucionar dúbidas de xeito presencial e outro de formación en banca electrónica para os cidadáns interesados en adquirir esas habilidades.
O caso de Barbanza
A comarca non foi allea a un proceso que tivo dous intres decisivos en certa maneira relacionados: por unha banda a crise económica que aínda se deixaba sentir amplamente a comezos da década, e por outra, un proceso de reestruturación das caixas e dos bancos que segue a día de hoxe en activo e que tivo un momento álxido coa fusión de Caixa Galicia e Caixanova, que trouxo consigo unha serie de transformacións económicas e urbanas (como o peche de sucursais en vilas ou barrios onde, supostamente, xa non se atopaba a rendibilidade nin a presenza poboacional requirida).
En Ribeira a devandita situación carrexou o peche de máis de media ducia de oficinas bancarias, seguida de preto por Rianxo, Boiro e A Pobra. O concello de Lousame, como dixemos, atópase nun claro recanto de exclusión financeira ao non contar con ningunha oficina.
A nivel galego perdéronse nos últimos anos arredor de 900 sucursais e 4.500 postos de traballo.
