20190626. A Deputación da Coruña acolleu hoxe o último pleno do actual mandato. Este serviu como sesión de trámite para a aprobación das actas, así como despedida da corporación. Do mesmo xeito, un ramo de flores e un minuto de silencio lembraron á deputada Ánxela Franco, falecida o pasado 2 de xuño. Tanto o presidente en funcións da Deputación, Valentín González Formoso como a vicepresidenta, Goretti Sanmartín Rei, interviñeron no pleno para destacar a honestidade, valentía e compromiso de Ánxela Franco.
González Formoso destacou da deputada que dirixiu a área de Benestar Social, Educación e Igualdade, a súa defensa “defensa do interese xeral, honestidade consigo mesma e a sociedade” e definiuna como unha “persoa sinceira, que nunca deixou de dicir o que pensaba, un orgullo tela como compañeira e amiga.”
Pola súa parte, Goretti Sanmartín amosou a súa tristeza pola ausencia dunha muller “temperamental, profundamente emocional, comprometida, inmensamente traballadora, capaz de empatizar con quen se achegaba a ela e tamén de mostrar o seu xenio cando era necesario.” Así mesmo, afirmou que a súa figura “dignifica a vida política e sitúase no polo oposto daquelas persoas que tiran dela proveito persoal.”
