A Asociación Creaturas e o Concello de Boiro organizan unha nova edición do Maio Vintage, un evento que xunta os ingredientes da creatividade, a cultura, a artesanía e o comercio para permitir a cidadáns e visitantes festexar a primavera en clave de proximidade. Será o vindeiro sábado 4 de maio na rúa peonil de Boiro. Así o fixeron saber en rolda de prensa a concelleira de Cultura, María Outeiral, Margarita Sampedro e Alberto García da Asociación Creaturas, e Suso Santamaría, responsábel da programación. Tamén explicaron que nesta edición participarán un total de 76 postos entre os que se atopan artesáns e tamén entidades como Unión de Muchachas, Ambar, A Creba, Turbina, Agadea, Cruz Vermella, Asociación Española Contra o Cancro e Boas Novas.
“Debido á gran demanda de postos, ampliamos o espazo no que se vai instalar o mercado ao longo da rúa peonil”, afirmou Margarita Sampedro, que engadiu nesta convocatoria participan representantes do comercio e da hostalaría locais como Atlántica, A Pousada da Galiza Imaxinaria, Tres Catorce, Furancho e Adria. Tamén desenvolverá un papel activo o alumnado de artes do IES Praia Barraña que vai realizar o seu proxecto final do curso no Maio Vintage Market.
Ademais dos postos de artesanía haberá actuacións musicais, obradoiros e outras actividades. “Trátase dun dos eventos máis completos que engloba ás entidades culturais, o comercio e a administración local e que favorece a dinamización económica e social”, recoñeceu Alberto García.
A programación cultural estenderase durante todo o día con actuacións de DJs, grupos locais e tamén espectáculos infantís. “A programación musical mestura grupos locais con outros de fora para ofrecer unha alternativa cultural para todos os públicos”, afirmou Suso Santamaría.
O obxectivo desta actividade é apoiar e difundir o traballo realizado por pequenas marcas, persoas dedicadas ao deseño, á ilustración, á fotografía…
“O Concello de Boiro colabora sempre con esta actividade que serve para dinamizar o municipio xa que participa xente de todas as idades e medra ano a ano“, afirmou a concelleira de Cultura, María Outeiral.
A temática desta onceava edición serán os anos 80, polo que dende a organización animaron a todas as persoas asistentes a caracterizarse con algo propio da época.
PROGRAMACIÓN
11.30h – DJ Bender
12.00h – obradoiros
12.00h – DJ Gafapasta
13.00h – Sanny Caster
14.00h – DJ Gafapasta
17.00h – Sabela
17.00h – obradoiro Breakdance
18.00h – concerto Punkinfantil
19.00h – Combo Paradiso
20.00h – Rasca e Pincha
