O Concello de Boiro celebra este 28 de abril o Día da Danza na Praza de Galicia cun espectáculo da Escola de Ballet Cen Pliés. A concelleira de Cultura, María Outeiral, presentou este mércores 24 a actividade, que comezará o domingo a partir das 12.30 horas.
Segundo informou, van participar unhas 50 nenas que interpretarán 6 bailes. “As asociacións culturais de Boiro son as que promoven este tipo de actividades para mostrar o traballo que fan durante o ano”, afirmou a concelleira que anunciou que esta colaboración coa Escola Cen Pliés se leva realizando xa tres anos para conmemorar o Día Mundial da Danza.
Tamén lembrou que “Boiro conta cun importante elenco de artistas que practican a danza, tanto tradicional, como contemporánea e tamén o ballet”, e que o Concello “celebra cada ano en setembro o mes da danza, un mes dedicado a todos estes artistas con espectáculos de distintas modalidades”.