O fundador da empresa Congalsa, Luis Simarro López, faleceu este domingo aos 76 anos de idade, provocando un fondo pesar na Pobra e Ribeira e no sector empresarial de Barbanza. Natural de Madrid, o emprendedor apostou por crear emprego e dinamizar economicamente a comarca poñendo en marcha a compañía de alimentación no ano 1990.
Situada na súa primeira etapa en Ribeira, con dúas naves situada na rúa Romero Ortiz e no barrio de Deán Pequeño, Congalsa trasladouse posteriormente ao polígono industrial da Tomada, na Pobra, onde se emprazan as súas instalacións actuais, nas que traballan case 600 persoas.
Luis Simarro López foi durante todo este proceso unha figura clave para o desenvolvemento económico de Barbanza, apostando pola creación dun proxecto empresarial que, paulatinamente, foi crecendo ata converterse na actualidade nunha das firmas de referencia dentro do seu sector en España.
Era pai de catro fillos, dous dos cales desenvolven a súa actividade profesional na empresa: Luis Miguel, director xeral, que asumiu as rendas da compañía en 1998; e Julio, director comercial e de márketing, Luis Simarro foi sempre unha persoa moi respectada e querida en toda a comarca.
Os restos mortais están no Tanatoiro de Xarás en Ribeira na sala 6 e o funeral terá lugar o martes 30 as catro da tarde na Parroquial de San Pedro de Palmeira.
