A concelleira de turismo de Outes, Soledad Agra, estivo a semana pasada en FITUR (Feira Internacional de Turismo) representando ó concello de Outes dentro das presentacións do Xeodestino Ría de Muros-noia, Ría da Estrela.
Durante a feira turística mantivo diversas reunións con representantes da industria turística, e tivo a oportunidade de promocionar os tesouros paisaxísticos, ambientais, gastronómicos e culturais do concello, destacando o compromiso de Outes coa promoción dun turismo responsábel e respectuoso coa contorna e que pon en valor o seu patrimonio natural e cultural.
A concelleira foi entrevistada no programa Miradas Viajeras polo xornalista especialista en turismo, Fernando Malvaseda. Ademais, pechou un contrato de promoción turística con Beatriz Sotelo, de Petiscos Galegos Travel Blog, con máis de 250 mil seareiros en redes sociais, e mantivo entrevistas con blogueiros e directores de revistas de turismo e viaxes para dar a coñecer os atractivos do concello de Outes e a calidade da oferta de restauración e hostalería local.
A maiores, participou na presentación da marca turística Ría da Estrela xunto coa alcaldesa de Muros, e os alcaldes de Noia (María Lago) e Porto do Son (Santiago Freire e Luis Oujo).
