O Concello de Ribeira adxudicou as obras do proxecto Escola de Deportes Náuticos de Aguiño e fíxoo cun orzamento de 1.210.000 euros e un prazo de execución de 14 meses. O obxectivo principal é “a construción dun edificio para albergar unha escola municipal e a sede do Club de Remo Náutico de Ribeira”, lembraron fontes do Consistorio, engadindo que “esta adxudicación chega despois de varios meses de traballo nos que houbo que modificar o proxecto inicial para evitar sobrecustes na obra ou para evitar a eliminación algún dos servizos que ofrecerá este equipamento deportivo”.
O equipo de Goberno sinala tamén que o edificio estará localizado na zona portuaria de Aguiño e terá unha superficie aproximada de 35,50 x 17,00 metros. No baixo haberá unha entrada, a recepción, espazo de almacenamento para embarcacións e foso de remo, mentres que o primeiro andar adicarase a un salón multiusos con despachos, baños adaptados, vestiarios e ximnasio con zona fitness e cardio.
O foso de remo permitirá o adestramento en condicións adversas e no inverno, mentres que a sala multiusos tamén permitirá a súa utilización como aula ou salón de conferencias.
Dende o equipo de Goberno local reafirman o seu “compromiso de seguir mellorando os fondos destinados á promoción do deporte ribeirense”.
Segundo explicou o propio rexedor, Luís Pérez Barral, “as remeiras e remeiros do Club de Remo Náutico de Ribeira levan tempo conseguindo éxitos e facendo un labor encomiábel e precisan unhas instalacións decentes. O labor que realiza este club, a pesar das precarias instalacións nas que adestran, fan que sexa de xustiza que teñan unhas instalacións axeitadas nas que poder desenvolver as súas actividades”.
E engadiu o rexedor: “Con esta adxudicación cumprimos coa nosa palabra e co traballo realizado ao longo dos últimos anos para materializar un proxecto que dotará á parroquia de Aguiño dunhas instalacións náuticas de primeiro nivel”.
