O candidato número 2 do PSdeG-PSOE pola provincia Julio Abalde e máis o secretario xeral provincial Bernardo Fernández Piñeiro acudiron a Noia para presentar na comarca do Barbanza a lista electoral presentada pola organización de cara ás vindeiras eleccións autonómicas.
Abalde, ex-reitor da Universidade da Coruña (UDC), comezou a súa intervención defendendo “o proxecto progresista e innovador de Besteiro, o único que pode garantir un cambio no Goberno de Galicia”. Considera que o Goberno presidido por Alfonso Rueda “é un goberno que minte, escurantista, falto de transparencia, como podemos ver coa crise dos granulados plásticos que tanto afecta a esta comarca”, dixo, engadindo que “precisamos un goberno que pense nas persoas, que traballe pola educación e a sanidade, que traballe polo futuro da mocidade, que xere postos de traballo e actividade económica, que pense na pesca e na agricultura”.
Abalde e Fernández Piñeiro recoñeceron que están a escoitar as inquedanzas da xente do Barbanza e das demais comarcas para “incorporalas ao noso traballo e ao noso futuro programa de Goberno”.
Fernández Piñeiro criticou “o desleixo da Xunta co sector marisqueiro, fundamental para a economía desta bisbarra e da nosa provincia, tanto na súa parte extractiva como na que afecta á transformación”.
Segundo lembrou, “está habendo problemas xa dende hai tempo coa produción de ameixa e sobre todo de berberecho, a máis importante a nivel económico, e a Xunta de Galicia, que ten a competencia exclusiva en materia pesqueira, non fai nada ao respecto”, explicou o socialista, engadindo que “non aporta axudas aos afectados, non aporta información nin medios para saber que está a pasar e aportar unha solución”.
“Esta é unha Ría na que atopamos polígonos de mexilón que antes estaban en nivel 1 e que agora están en 2 en contaminación, impedindo que se poidan vender en fresco”, advirte Fernández Piñeiro. “A contaminación incrementouse ao longo dos últimos anos, pero a Xunta de Galicia non está a reinvestir os fondos e impostos que recada para tal fin”, critica.
Abalde e Fernández Piñeiro recoñeceron que “tamén nos preocupa a ausencia de residencias públicas de anciáns na comarca”, se ben salientaron que se está a construír agora unha destas en Rianxo, pero “impulsada pola Deputación, non pola Xunta de Galicia que é quen ten as competencias, xa que esta fai oídos xordos e deixa de lado a un terzo dos galegos e galegas, que son os pensionistas”.
