Perante a marea de granulados plásticos que segue presente nas costas galegas, ADEGA (Asociación para a Defensa Ecolóxica de Galiza) vén de marcar unha nova data para participar en varias limpezas de praias simultáneas. Estas accións celebraranse o vindeiro sábado, 20 de xaneiro, en areais de Cangas e Muros, onde se conta co apoio dos concellos, e Barreiros, limpeza coa que colabora o Concello de Lugo.
Máis polo miúdo, a limpeza no concello de Barreiros terá un carácter formativo e estará dirixida, sobre todo, a aquelas persoas que teñan interese en coordinar futuras accións de voluntariado para a retirada de microplásticos e outro lixo mariño dos areais. Este carácter formativo responde á necesidade de achegar ao voluntariado instrucións precisas e claras de como se debe de actuar para realizar unha limpeza axeitada de residuos e, particularmente, dos granulados de microplástico que asolan as nosas costas. O Concello de Lugo, que financia esta actividade, porá a disposición das persoas participantes un autobús con saída de Lugo ás 10h e hora estimada de regreso ao mesmo punto da cidade ás 15:45h.
O persoal de ADEGA que coordinará estas actividades porá a disposición de todas as persoas participantes un protocolo de limpeza do lixo mariño, con especificacións concretas para a retirada de pellets de microplástico das praias, o seguro e o material preciso para o desenvolvemento da limpeza con todas as medidas de seguridade. As prazas para calquera das tres xornadas son limitadas e o voluntariado interesado en participar xa pode inscribirse a través dos seguintes formularios:
– Xornada de limpeza de praias en Cangas/Muros.
– Xornada de limpeza de praias en Barreiros.
Unha vez aceptadas as solicitudes, as persoas voluntarias recibirán por correo electrónico toda a información específica sobre os puntos de encontro e as praias concretas nas que se actuará. Para futuras convocatorias, as persoas interesadas poden preinscribirse a través da ligazón específica habilitada.
Engadir que ADEGA xa organizou a pasada semana máis accións deste tipo, a asociación ecoloxista leva coordinado a arredor de 210 persoas voluntarias que se achegaron a varios puntos da costa galega para colaborar na retirada de lixo mariño. Todas estas persoas recibiron formación básica para a organización de grupos de voluntariado nas limpezas de praias. Nestas accións recolléronse un total de 24 kg de pellets plásticos e máis de 107 kg doutros residuos, particularmente, nos areais de Boa Grande (Noia), Lariño (Muros), Queiruga e Arnela (Porto do Son), Pedra da Sal (Carballo), Nerga (Cangas) e Barreiros (Lugo).
Alén das accións de recollida de pellets, ADEGA tamén fai un chamamento á sociedade para acudir á manifestación convocada polo movemento ecoloxista e o sector do mar o domingo, 21 de xaneiro, en Compostela, co obxectivo de denunciar a tardanza e o desleixo das administracións públicas na xestión desta chegada masiva de materiais plásticos á costa galega.
Para máis información:
Limpeza en Cangas: Miguel Leirós (661107678)
Limpeza en Muros: ADEGA Xeral (981 570 099)
Limpeza en Barreiros: Lucía A. Anido (677800293)
