O alcalde de Boiro, José Ramón Romero, e o tenente de alcalde, Luís Ruiz, mantiveron este venres 29 de decembro unha xuntanza co presidente da Federación Galega de Municipios e Provincias (FEGAMP), Alberto Varela, para tratar asuntos relacionados coa actualidade das entidades locais e a realidade do Concello. Na reunión abordáronse temas relacionados coa realidade das entidades locais e do seu financiamento e competencias, así como dos últimos cambios normativos e as eivas que presenta o actual sistema para poder ser corrixidas.
O alcalde, José Ramón Romero, trasladou ao presidente da FEGAMP cal é na actualidade a situación do Concello de Boiro, no que se prestan servizos e aténdense demandas que non lle corresponden á Administración local: “Trátase dunha situación que demostra a falta de atención por parte da Xunta de Galicia, que debería manter unha posición ecuánime e respectuosa con todos os concellos”, recoñeceu o alcalde.
Pola súa parte o presidente da FEGAMP trasladou cales eran as actuais liñas de traballo que estaba a ter a institución para acadar obxectivos que beneficien aos concellos. Estas negociacións tratan sobre a realización por parte dos concellos de traballos que lle son impropios así como da asunción de competencias, e da mellora no financiamento destas prestacións.
Durante a xuntanza abordouse tamén a actualidade dos fondos Next Generation e a repercusión que están a ter nas entidades locais ao aportar colaboración para o financiamento de distintos proxectos.
