O Concello de Boiro vai impartir durante a anualidade 2023-2024 un programa de actividiades AFD (Accións Formativas para Desempregados). Ao abeiro desta axenda, o vindeiro día 18 de decembro comeza o curso de Servizos de Bar e Cafetería de nivel 2 destinado a quince persoas desempregadas.
Os obxectivos desta acción formativa son “mellorar a cualificación profesional das persoas traballadoras e mellorar as competencias profesionais relacionadas cos requirimentos de produtividades e competitividade das empresas, as necesidades de adaptación aos cambios nos sectores produtivo e a inserción laboral”.
O Concello de Boiro explica que o certificado de profesionalidade de Servizos de Bar e Cafetería impartirase no Centro de Formación e Viveiro de Empresas de Espiñeira entre o 18 de decembro e o 19 de xuño de 2024 cun total de 658 horas de duración no que as persoas participantes obterán o certificado e completarán un período de prácticas en empresas da zona.
Esta acción formativa está destinada a persoas que conten con estudos de nivel ESO ou competencias clave nivel 2, así como persoas que conten co certificado de profesionalidade da mesma familia nivel 1. As persoas interesadas en inscribirse para participar deberán facelo a través do enderezo electrónico emprego@boiro.gal ou o teléfono 981 84 26 09.
