A concelleira de turismo, Sol Agra Tuñas, e o tenente alcalde, Anxo Núñez Fernández, mantiveron unha reunión coa Asociación Galega Autocaravanas (AGA) para avaliar localizacións para unha futura area de autocaravanas e estudar como ordenar e mellorar o impacto económico deste tipo de turismo.
O obxectivo do Goberno local é “aumentar o impacto económico e prestar un servizo de calidade para os visitantes” á vez “que se intentan evitar os problemas habituais que veñen sucedendo nos últimos anos ao concentrárense as autocaravanas na praia de Broña”.
Na reunión baralláranse diferentes posibilidades e visitouse un dos emprazamentos propostos polo Executivo de Outes, sendo avaliada de xeito moi positivo pola Asociación Galega de Autocaravanas.
A concelleira de Turismo e o Tenente alcalde, concelleiro tamén da área de mobilidade, estudarán nos vindeiros meses as actuacións a acometer nun futuro próximo para a creación dun aparcadoiro de autocaravanas no concello de Outes.
