Unha operación conxunta desenvolvida no porto e enseada de Ribeira polo Servizo Marítimo Provincial da Garda Civil e o Servizo de Gardacostas da Xunta permitiu a incautación de máis de cinco toneladas de anchoa ou bocarte, concretamente 5.289 quilos, a dous barcos do sector do cerco por exceso de carga, levantándose as correspondentes actas por infraccións á Lei de Pesca de Galicia. Ao parecer, a Garda Civil do Mar, que dirixiu a intervención, descubriu como se estaba realizando un primeiro transbordo de exceso de carga dun barco a outro máis pequeno e que, posteriormente, levou a cabo outro, e solicitaron o apoio de Gardacostas. Segundo indicaron algunhas testemuñas, foi nas primeiras horas da noite do martes cando se puido ver a axentes do instituto armado por terra dirixíndose a unha desas embarcacións, que era á que se transbordó o exceso de carga e que finalmente quedou amarrada nas proximidades dos pantaláns da Xunta, preto do edificio de Portos de Galicia. Pola súa banda, o persoal da unidade operativa do Servizo de Gardacostas en Ribeira saíu ao paso do outro buque coa súa lancha “Illas Malveiras” e, tras interceptalo, conducírono ata o porto, quedando amarrada xunto a lonxa.
