Ribeira amenceu este venres coa triste noticia do falecemento de Manuel Ruiz Rivas, técnico municipal de Deportes durante as tres últimas décadas. Tiña 62 anos e morreu na madrugada deste venres vítima dun cancro.
Miguel Ruiz era unha persoa moi querida no municipio, especialmente no ámbito deportivo. Ex-xogador do Atlético de Ribeira, desde o seu posto como técnico municipal impulsou varias escolas deportivas na localidade.
A comezos dos 90, Miguel Ruiz incorporouse ao departamento de Deportes do Concello de Ribeira como técnico municipal. Desde ese posto, impulsou diferentes disciplinas a través das escolas, pero tamén colaborou con clubs e entidades. O pasado mes de outubro, o Natural Sport recoñecía o seu traballo brindándolle unha homenaxe e esta mañá, nada máis coñecerse a noticia, desde a entidade lamentaban a perda: «Sempre agradeceremos toda a súa axuda e ou esforzo que lle prestou ao club e ao concello para a promoción do deporte».
Estaba casado e tiña tres fillos. A capela ardente está instalada na sala 3 do Tanatorio do Barbanza, situado en Xarás, onde os seus restos mortais serán incinerados este venres 3 ás 21.00 horas na intimidade familiar. Miguel era irmán do exalcalde de Ribeira e senador Manuel Ruiz Rivas. O funeral polo seu eterno descanso celebrarase este sábado día 4 ao mediodía na igrexa parroquial de Santa Uxía de Ribeira.
