Este pasado sábado 21 de outubro continuaron en Outes, malia as inclemencias climáticas, as andainas do programa de reivindicación cultural, medioambiental e paisaxística Coñece o noso patrimonio, encamiñado a mostrar os tesouros do concello ante residentes e visitantes (a través de andainas guiadas). Este sábado realizouse o roteiro De Mirás a Carleo polo cristo de Baneo. A vindeira andaina Camiñando cara a orixe do concello de Outes celebrarase este domingo de outubro (29) e xa está aberto o prazo de inscrición.
Máis información na páxina web: outes.gal.
A Área de Cultura de Outes lanzou en setembro a nova edición deste ciclo de andainas: unha serie de itinerarios conducidos por especialistas na riqueza cultural local.
As andainas comezaron o 24 de setembro co roteiro Historia ás beiras do río Bendimón e proseguiron o 7 de outubro co percorrido Historia do Freixo e o rego de Rial, de 10 quilómetros de lonxitude e con saída ás 9.00 do centro náutico.
Continuaron o día 15 de outubro cunha andaina cara a torre dos Mouros e as fervenzas de San Paio. O 21 celebrouse o percorrido De Mirás a Carleo polo cristo de Baneo.
