O Concello de Boiro aproba a Oferta de Emprego Público correspondente ao ano 2023 mediante a que se convocan oito prazas, seis de persoal funcionario e outras dúas de persoal laboral. Os procesos selectivos comezarán a convocarse nas vindeiras semanas.
Entre as prazas de persoal funcionario que se van convocar está a de técnico de contratación, unha praza da categoría da escala de administración xeral – Técnica Superior A1 que se fará por quenda libre. Tamén por quenda libre se convocan tres prazas de policía da escala Administración especial – Servizos Especiais C1.
Por mobilidade convócase unha praza de policía e outra de oficial de policía, as dúas de subgrupo C1. “O noso obxectivo é que as prazas do corpo da Policía Local incluídas na OPE se convoquen logo da sinatura do convenio coa administración autonómica para que os procesos selectivos se leven a cabo mediante a AGASP e o proceso sexa máis rápido e sinxelo”, afirmou o alcalde, José Ramón Romero.
En canto ao persoal laboral que se inclúe nesta Oferta de Emprego Público está unha praza de educador/as familiar a tempo completo do subgrupo A2. Tamén se convoca unha de conserxe para persoal con discapacidade a tempo completo e do subgrupo C2.
“A escaseza de persoal é un problema latente no noso Concello, por iso queremos comezar canto antes os procesos selectivos para cubrir estas prazas o antes posíbel e garantir o correcto funcionamento dos servizos municipais e a atención á veciñanza”, afirmou a concelleira delegada de Persoal, María Outeiral.
