O Concello de Boiro vai impartir tres accións formativas dirixidas a mellorar a cualificación de persoas desempregadas no período 2023-2024. Os cursos que se levarán a cabo van ser de Servizos de bar e cafetería, de Atención sociosanitaria a persoas no domicilio e de Cociña.
O obxectivo destas accións formativas é “mellorar a cualificación profesional das persoas traballadoras” e “reforzar as competencias profesionais relacionadas cos requirimentos de produtividade e competitividade das empresas, as necesidades de adaptación os cambios dos sectores produtivos e á inserción laboral”.
Os certificados de profesionalidade que se van impartir son os de Servizos de bar e cafetería, de 658 horas de duración; Atención sociosanitaria a persoas no domicilio, de 618 horas de duración; e Cociña, de 828 horas de duración.
“A solicitude destas familias formativas nace demandas dos sectores que teñen unha maior demanda de man de obra cualificada no noso municipio e na nosa comarca”, recoñeceu o alcalde, José Ramón Romero.
En todos os cursos levarase a cabo un módulo transversal de Inserción laboral, sensibilización ambiental e na igualdade de xénero, un módulo formativo sobre igualdade de oportunidades entre homes e mulleres e sobre corresponsabilidade familiar e doméstica e manipulador de alimentos. Todas as accións formativas contan con prácticas profesionais non laborais en empresas.
Para levar a cabo estas propostas formativas o Concello de Boiro recibe da Consellería de Promoción do Emprego da Xunta de Galicia una subvención por importe de 221.409,30 euros.
