Este domingo inaugurouse en Rianxo a exposición que conmemora as nove décadas de traballo incansábel da histórica agrupación teatral con sede en Asados: o grupo Airiños. Trátase da mostra 1933-2023, Airiños 90 anos, a través da cal poderemos ver o vestiario que marcou a longa historia da agrupación sobre as táboas e en cuxa inauguración participaron o tenente alcalde e concelleiro de Cultura, Julio Alcalde, e a concelleira de Política Social de Rianxo, Ana Vidal.
A cerna da exposición é como dixemos unha escolma dos vestiarios das funcións levadas a cabo dende 1933 polo grupo rianxeiro, dende o máis actual (pezas como As vellas non deben de namorarse, Unha primavera para Aldara, Romeo e Xulieta, República Sideral) até outras máis antigas que teñen o engadido extra de amosar aos visitantes a pátina do tempo, como A fiestra baldeira ou Os vellos non deben de namorarse, escritas ambas por outros dous ilustres veciños de Rianxo: Rafael Dieste e Castelao. Tamén pode verse o vestiario de A fraga desanimada, cuxas prendas levan inscrustadas pólas reais de piñeiro e de eucalipto.
Na cita presentouse tamén o libro Airiños: 90 anos de teatro do pobo. A exposición poderase visitar no Auditorio de Rianxo durante as vindeiras semanas. Para a dobre cita contouse coas actuacións de Barahúnda e Sabela Galbán.
