O vindeiro sábado, 30 de setembro a ría de Muros-Noia acollerá a primeira Regata da Liga Nacional de Remo de Mar e a única da liga nacional que se celebra en Galicia. Será na praia de Ornanda (Porto do Son).
Esta semana as instalacións do Club do Mar de Noia acolleron a presentación oficial da proba ante os medios de comunicación. Na cita confirmouse que o evento deportivo incluirá unha homenaxe a José González Capeáns ( Memorial “José González Capeáns”). A regata desenvolverase en horario de mañá e tarde e o inicio previsto será, aproximadamente, ás 09:30h.
Organiza o Club Mar de Noia, en colaboración coas Federacións Galega e Española de Remo.
Achega o seu apoio os Concellos de Noia e Porto do Son, ADECO-DEA e outras entidades, co patrocinio de Iberdrola.
A proba, a única desta modalidade deportiva que se desenvolve en Galicia, reunirá a uns 150 remeiros chegados dende diferentes clubs de todo ámbito nacional.
Como dixemos, amais do evento principal, celebrarase tamén o Trofeo de Promoción Memorial “José González Capeáns”, para categorías base, un dos grandes colaboradores do Club Mar de Noia recentemente falecido.
